ماوصل شيعي أمس يدفن حسين - طلعت الأعراب سكته ودفنته
وهسه كل الناس تبجي له وتنوح - ومن شمال الصين وادم زارته
يالتزور حسين إصبر لاتزور - إقره ليش حسين قامت ثورته
حتى من تنزل دمعتك عالحسين - تعرف شكَد الثواب بدمعته
تدري ليش الميت ايعصره القبر؟ - وتدري شيصيح القبر في ميته؟
خاف حابس دمعة في حق الحسين - اليوم تطلع من ظفر سبابته
وحتى تعرف منك شرايد حسين - مو تزوره وأنت جاهل غايته
حسين رايد روح تنهض بالضريح - مو تحط دينار ماهو بحاجته
روح علق قلبك اباب الحسين - وشيل كل هاي الذهب من حضرته
حسين مامحتاج حكَ قبة ذهب - الذهب محتاجه راح إلقبته
والناس لو تدري الذهب قصد الحسين - جان مانصرت يزيد وخانته
وياهو كَال الشيعة فقدت جم حسين - وياهو كَال هوايه وادم تبعته
صاح صوت امن السما بمقتل حسين - وبعده لسه يصيح محد سكته
من ذبحتوا احيسن بكيتو الشمس - بس خيال حسين يشتم الهوى
ومن بكت عين الشمس ضوٌى الظلام - وكلشي صار اخيال واحسين الضوى
أقنعتكم كلها طيحها الحسين - الثورة ماخلٌت وجه ماكشفته
وحرتو شتلبسون سيدكم يزيد - وهيٌَ كل الشيعه عرفت صورته
ومن فضحكم نور سيدنا الحسين - سيوفكم للراس راحت كَصته
وتالي حرتو, ماخفى راس الحسين - وفوق راس حسين ضوٌت جثته
ومن فشلكم شلتوا راسه اعلى الرماح - وقلتو راس احسين نزلت قيمته
ما تِنَزل أرماحكم راس الحسين - بالعكس عالروس كلهن علٌته
ثبتت الكفار فوزك ياحسين - والجرى بصفين بالطف عادته
بس فرق شلٌت يزيد بكربلاء - مالكَت قرآن, راسك شالته
وبكَت جثت احسين تضوي اعلى التراب - وانتقل نور الحسين ابتربته
وهسٌه كلمن يسجد ابتربة حسين - تنزل الجنٌة تختمه بكَصته
وانتو بيكم بيٌنت شارت حسين - وماعلينه شلون بيٌن شارته
المهم فوزين فزنا احنا بحسين - فوز حبٌه وفوز فضل زيارته
الله يحسب حجة وحدة بكل سنة - للسبع مرات طاف ابكعبته
واحنا لو رحنا مشي نزور الحسين - نمشي كل خطوة تعادل حجته
الأربعاء مارس 25, 2009 10:51 pm